Pardew er 56 ára og hefur verið atvinnulaus síðan hann var rekinn frá Palace í desember 2016.

Hann hefur skrifað undir samning við West Brom til loka tímabils 2019-20 og er sjötti stjóri félagsins síðan 2011.

„Ég er hæstánægður með að fá þetta tækifæri frá Albion og hlakka til að vinna með hópi sem að mínu mati er mjög hæfileikaríkur," segir Pardew.

„Áskorunin felst í því að sækja úrslitin sem þurfa til að toga okkur upp töfluna."

Fyrsti leikur Pardew við stjórnvölinn verður deildarleikur gegn Palace á laugardaginn. Svo koma útileikir gegn Liverpool og Swansea áður en WBA leikur gegn Manchester United á heimavelli.

Gary Megson stýrði West Brom til bráðabirgða eftir að Tony Pulis var rekinn en hann hefur nú yfirgefið félagið. Megson var aðstoðarmaður Pulis.

Pardew hefur einnig stýrt Reading, West Ham, Charlton og Southampton á 18 ára stjóraferli. Hann tapaði tvisvar í úrslitum FA-bikarsins sem stjóri.